Trojan Horses

 شنو كتعرفو على Trojan Horses او ما يعرف باحصنة طروادة ؟ كيفاش تيخدم ؟ شنو هو الانواع ديالو ؟ وطرق الاصابة ديالو ؟ وكيفاش نحميو راسنا منو ؟ هادي اسئلة واخرى غنحاول نجاوبو عليها فهاد البوسط ان شاء الله .

لكن اولا علاش تسمى بهاد الاسم حصان طروادة ؟ الجواب لانه كيخدم بالطريقة لي استعملوها الاغريق في فتح مدينة طروادة لي كانت محصنة جدا اوستعصا عليهم الفتح ديالها بالحرب او بالطرق الكلاسيكية , فاستخدمو الذكاء ديالهم وبناو مجسم كبير على شكل حصان من الخشب وخاوي من الداخل ديالو وعمروه بالجنود وحطوه حدا بوابة مدينة طروادة , ودخلوه صحاب مدينة طروادة وفي اليل خرجو الجنود من المجسم وفتحو ابواب المدينة للجنود الاغريقية وقامو باحتلال مدينة طروادة ولكن هادا ماشي الموضوع ديانا .

التروجان هو البرنامج خطير بزااف الاخطر فيه انه كيكون فجهاز الضحية بدون ميسيق ليه الخبار وهاد التروجان كيدير خدمتو بلا متسيق ليه الخبار فكيسرق الملفات الشخصية وكيقوم بتدمير البيانات لي في الجهاز ديالك وكيجمع الباسوردات ديالك لي كتستخدمها في جميع الحسابات ديالك في الانترنيت بحال الفيسبوك ديالك والاميل و معلومات البطاقة البنكية ديالك الى كنتي كتشري بيها عن طريق الانترنيت .

مزيان ها حنا عرفنا هاد التروجان , ولكن هو كيفاش كيخدم ؟ برنامج التروجان كتكون فيه نسختين  الخادم و المستفيد , فالمهاجم كينشر نسخة الخادم على اي برنامج في الانترنيت وخصوصا البرامج غير معروفة المصدر او برامج تم تحميلها على مكان غير رسمي بحال لعبة او  اي برنامج ومني كيقوم الضحية بتحميل هاد البرنامج لي فيه التروجان الخادم وكيانسطاليه في الجهاز ديالو فكتخدم نسخة الخادم في الجهاز ديالك بدون العلم ديالك على طريقة حصان طروادة , فنسخة الخادم كتحاول تفتح ثغارات في الجهاز ديالك باش اتسقبل الاوامر من المهاجم فهنا المهاجم كيرسل نسخة المستفيد للجهاز ديالك عن طريق الانترنيت , وهنا كتبدا الخدمة ديال المعقول فالنسخة دالخادم كيرسل اميل للمهاجم فيه معلومات حول الجهاز بحال اسم الجهاز و Ip ديالو والمكان ديالو ونسخة الخادم كيقدر اخدم راسو واخا تطفي البيسي وتعاود تشعلو وفيه كلمة المرور .

السؤال لي كيطرح راسو دابا هو كيفاش كيثكاثر هاد التروجان ؟ هاد التروجان على عكس الفيروسات الاخرى لي كثكاثر اليا بدون تدخل الضحية فهاد التروجان كينتاقل يديويا عن طريق تبادل البرامج لي فيها هاد التروجان .

وشنو الامور لي كيقلب عليها المهاجم في الجهاز ؟ المهاجم كيستخدم الطروجان باش اوصل لمعلومات حساسة في الجهاز بحال ارقام البطاقات البنكية او الحسابات البنكية الالكترونية بحال بيبال او محفضات البتكوين وغيرها وكيبحث ايضا على الباسودر ديال الحاسبات لي تم التسجيل دياها في الجهاز بحال كيما قلنا الفيسبوك والبريد الالكتروني واخير معلومات الضحية بحال الصور والفيديوها باش اقدر ابتز الضحية ....  .

شنو هي انواع التروجان ؟ التروجان فيه بزااف دالانواع لكن اشهرهم 4 انواع وهما : Remote Administration Trojan و File Server Trojan و Password Sending Trojan و Spam Relaying Trojan هادو اشهر الانواع والى جينا نشرحوهوم هنا فغيكون البوسط طويل ومممل بزااف لكن انشاء الله نخصصو ليهم بوسط بوحدهوم .

شنو الطرق لي كيستخدما المهاجم باش اوصل التروجان للجهاز ديالك ؟ كايني بزااف الطرق واندكروهوم بعجالة بدون الشرح ديالهم , فاغلب الاحيان المهاجم كيتسخدم البرامج وخصوصا لي ممعروفاش ولي معرفة وتيليشارججيتيها من مكان غير رسمي , لذالك ضروري تيليشاجي البرامج المعروفة فقط ومن الموقع الرسمي ديالها او من المواقع الموثوقة .ومن الطرق ايضا هو الدخول المباشر للجهاز دياك مثلا مريح فمقهي او فبلاصة وكتنوض للمرحاض وكتخلي الجهاز ديالك مفتوح هنا في دقيقية امشي للجهاز ديالك اتيليشارجي فايل صغير وها نتا مصيد لذالك متخليش الاجهزة ديالك مفتوحة ديما دير باسورد قوي للجهاز . هادو من اشهر الطرق لي كيستخدموها المهاجمين لكن كايني طرق اخرى .

دابا السؤال المهم وهو كيفاش نحمي راسي من التروجان ؟ باش تحمي راسك خاصك توفر اجهزة الحماية في الحاسوب ديالك وتحاول تستخدم فقط برامج معروفة في الحاسوب ديالك وعمرك تيليشارجي اي برنامج من اي بلاصة وتنصبو في الجهاز ديالك وايضا عمرك تعطي فرصة لاي شخص اوصل للحاسوب ديالك وخاصت تحمي الجهاز ديالك بال Firewall واخصك دير تحديث للنضام التشغيل واي برنامج باستمرار لانه فعبض البرامج كيم رفع الحماية و الدعم من النسخ القديمة من البرامج و ايضا الكراك شي حاجة خطيرة بزااف حاول تفاداها المهم حاول تبحث اكثر في الانترنيت على برامج فحص التروجان ومتصغرش من البيانات لي عندك في الجهاز وتقول ادودي اش غيديرو بالبيانات ديالي هادو بغاو شي حد عندو الفلوس لا ديما عتابر البيانات ديالك مهمة جدا وحافض عليها لانه تقدر تستخدم ضدك 

كنتمنا نكون فدتك ولو بمعلومة بسيطة .

والسلام